Vizita në Tiranë/ Presidenti gjerman, Steinmeier asnjë fjalë për ‘Ballkanin e Hapur’

Nga Tirana Presidenti gjerman, Frank-Walter Steinmeier ishte i qartë në mesazhet e tij konkrete ku nënvizoi se Procesi i Berlinit është rruga që përshpejton integrimin drejt BE-së.

Në asnjë fjalë as në fjalimin që mbajti sot në mesditë në parlament dhe as në konferencën e përbashkët me presidentin e Shqipërisë, Bajram Begaj, Frank-Walter Steinmeier nuk përmendi nismën “Ballkani i Hapur” por kryefjalë e tij ishte procesi i Berlinit.

Frank-Walter Steinmeier: “Ju kontribuat që në datën 3 nëntor në Berlin të nënshkruheshin 3 marrëveshje të rëndësishme mobiliteti mes 6 vendeve të Ballkanit Perëndimor. Këto marrëveshje janë një gur kilometrazhi mes marrëveshjeve rajonale dhe do të ndryshojnë në mënyrë domethënëse realitetin jetësor të njerëzve.

Edhe për qytetarët e Shqipërisë do të jetë e mundur që të udhëtohet vetëm me një dokument identifikimi në vendet e tjera të Ballkanit Perëndimor e në të njëjtën kohë njohja reciproke e kualifikimeve profesionale përbën një hap të rëndësishëm në ngritjen e nëj tregu të përbashkët rajonal.

Ratifikimi dhe zbatimi i marrëveshjeve të nënshkruara të mobilitetit do të shkurtojnë distatncat me tregjet e BE-së duke e shndërruar rajonin më atraktiv dhe konkurues. Na gëzon fakti se vitin e ardhshëm këtu në Tiranë do të zhvillohet samiti i Procesit të Berlinit. Në samitin e këtij viti u miratua gjithashtu një deklaratë e përbashkët në sektorin e energjisë e cila përmban autoangazhime e detyrime në angazhim të axhendës së gjelbër për një bashkëpunim më të fortë rajonal.

Të zbatohen marrëveshjet e Berlinit
Në konferencë më tej nënvizoi se është e rëndësishme që të zbatohet në pikëpamje konkrete marrëveshjet e firmosura në kuadër të këtij procesi, dhe jo vetëm të jenë marrëveshje politike

Frank-Walter Steinmeier: “Gjermania e ka parë përgjegjësinë e vet edhe për të mbështetur reformën e drejtësisë dhe për tu aktivizuar në reformën elektorale. Mendoj se në Shqipëri dhe në mbarë rajonin e Ballkanit Perëndimor është perceptuar qartësisht se ne e shfrytëzojmë Procesin e Berlinit për të përshpejtuar rrugën e anëtarsimit drejt BE-së, që këtu të krijojmë e të bëjmë gati rrugën për një bashkëpunim rajonal duke reduktuar p.sh. pengesat e mobilitetit të Ballanit Perëndimor.

Në këtë kontekst luajnë një rol të rëndësishëm edhe tre marrëveshjet e mobilitetit. E rëndësishme është që këto marrëveshje të zbatohen nga pikëpamja konkrete dhe jo vetëm të jenë marrëveshje politike në mënyrë që të 6 vendet e Ballkanit Perëndimor pa pengesa dhe vetëm me kartat e identitetit të mund të lëvizin mes njëri-tjetrit.

Mobiliteti mes vendeve mund të arrithet në rats se njihen në mënyrë reciproke diplomat universitare dhe kualifikimet profesionale të vendeve të Ballkanit Perëndimor. Për këtë gjë jemi angazhuar mjaft gjatë muajve të shkuar. Në emër të gjithë instancave të republikës federale të tregoj se kemi pasur suksese të konsiderueshme.”

Begaj: Nuk këshilloj qeverinë për Ballkanin e Hapur
Po presidenti Begaj a do i kërkojë qeverisë shqiptare që të mbajë qëndrim ndaj Ballkanit të Hapur ku bën pjesë dhe Serbia?

Pyetjes së gazetarëve në konferencë për median presidenti Begaj tha se nuk mund ti jepte këshillë qeverisë lidhur me Ballkanin e Hapur.

Bajram Begaj: Sa i takon procesit të Berlnit është shumë i rëndësishëm. Firmosja e tre marrëveshjeve para një muaji për lëvizshmërinë krijon premisa për marrëveshje të reja në të ardhmen. Është e rëndësishme implementimi i këtyre marrëveshjeve dhe që vendet të respektojnë. Nuk është se unë mund ti jap këshillë lidhur me Ballkanin e Hapur apo procesin e Berlinit. Procesi i Berlinit nga ana e qeverisë është marrë seriozisht dhe vitin e ardhshëm do të mbahet në Tiranë.

Ballkani i Hapur për mendimin tim është proces integral dhe nëse do të jetë i gjithëpërfshirë me të gjithë vendet e rajonit dhe do të ketë në fokus lëvizshmërinë e bashkëpunimin ekonomik është i mirëpranuar. Në këtë aspekt çdo bashkëpunim rajonal në interes të mirëqënies së qytetarëve, është i mirëpritur.”

Presidenti gjerman Steinmeier do të qendrojë në Shqipëri në një vizitë dy ditore dhe është stacioni i dytë i udhëtimit të tij në Ballkan, ku ai vizitoi edhe Maqedoninë e Veriut.