Pushuesit shqiptarë dhe turistët e huaj, që do të fluturojnë nga Tirana këtë sezon veror, do të paguajnë më shumë.
Të dhënat nga kompanitë e fluturimeve tregojnë që, nëse prenoton sot një biletë për të shkuar në Barcelonë, Berlin, Vjenë e Dubai për muajt qershor, korrik apo gusht kushton nga 20 deri në 50 për qind më tepër se një vit më parë.
Ajo që bie në sy është që shtrenjtimi i biletave ka përfshirë edhe kompanitë “low-cost” të fluturimeve.
“Një treta e lëvizjes së shtetasve në Shqipëri kryhet nëpërmjet ajrit. Rreth 19 për qind e turistëve të huaj që hyjnë në vend vijnë nga ajri. Në qershor korrik dhe gusht po ka një rritje deri në 3-fish të prenotimeve sipas Booking. Sigurisht sipas ligjit kërkesë/ofertë, kjo ndikon edhe te çmimi i biletave të avionit”, thote Zak Topuzi, kreu i shoqatës së Hoteleri-Turizmit
Vitet e fundit, turizmi në vend ka arritur në nivelet më të larta historike. Shtimi i linjave direkte dhe çmimet relativisht të ulëta të biletave kanë qenë dy ndër arsyet.
Por si pritet të ndikojë shtrenjtimi i fluturimeve te turizmi?
“Sigurisht që ndikimi i çmimeve është i rëndësishëm, por me trendin po tregohet që turizmi elitar është e ardhmja. Raportet e fundit tregojnë se deri në vitin 2035 do të 3-fishohen të ardhurat nga turimiu elitar”, vijon Topuzi.
Të dhënat tregojnë se Spanja dhe Franca janë dy shtete, drejt të cilëve janë shtrenjtuar më shumë biletat për muajt e verës, ndërsa drejt Italisë apo Greqisë çmimet kanë mbetur thuajse të njëjta.
Discussion about this post